मनाेन यादव /सर्लाही
भदौ- ६, सर्लाहीको गोडैता नगरपालिका–९ बकैनियामा आधुनिक सुविधा सम्पन्न कृषि तथा पशुपन्छी सेवा केन्द्र स्थापना गरिएको छ।
ग्रामीण उद्यम तथा आर्थिक विकास आयोजना अन्तर्गत विश्व बैंकको २ करोड २५ लाख रुपैयाँको सहयोगमा बनेको उक्त भवनलाई शुक्रबार एक विशेष समारोहका बीच आर्थिक करिडोर कार्यालय बर्दिबासले औपचारिक रूपमा नगरपालिकालाई हस्तान्तरण गरेको हो।
समारोहका प्रमुख अतिथि नगरप्रमुख देवेन्द्र यादवले सेवा केन्द्रको उद्घाटन गर्दै यसले किसान र पशुपालकलाई गाउँमै सहज र गुणस्तरीय सेवा उपलब्ध गराउने विश्वास व्यक्त गरे।
उनले आइतवारदेखि नियमित रुपमा कृषक तथा पशुपालकहरूले सेवा पाउने व्यवस्था हुने जानकारी दिए। आर्थिक करिडोर कार्यालय बर्दिबासका प्रमुख राजेश साहका अनुसार सेवा केन्द्रमार्फत कृषकले माटो परीक्षण, खेतीपातीका प्राविधिक सल्लाह, रोग–कीराको नियन्त्रण सम्बन्धी मार्गदर्शनलगायतका सेवा प्राप्त गर्न सक्नेछन्।
त्यस्तै, पशु प्राविधिकमार्फत बिरामी पशुचौपायाको औषधोपचार, कृत्रिम गर्भाधानसहितका सेवा पनि उपलब्ध गराइने उनले बताए। नगरप्रमुख यादवले यहाँका अधिकांश स्थानीयवासी कृषि र पशुपालनमै निर्भर रहेकोले गाउँमै आवश्यक सेवा उपलब्ध गराउनका लागि यो केन्द्र स्थापना गरिएको बताए।
उद्घाटन कार्यक्रममा नगरपालिकाका उपप्रमुख, सबै वडाध्यक्ष, कृषि तथा पशु प्राविधिक, आर्थिक करिडोर बर्दिबासका अधिकारी, कर्मचारी, किसान तथा पत्रकारहरुको उल्लेख्य उपस्थिति रहेको थियो।
