लालबन्दी, माघ १८ – हरेराम सङ्घीर्तन कृञ्ज, स्याङ्वाडाँडा, पत्थरकोट, लालबन्दी–१२ मा अवस्थित शेष महलमा तीन दिने भव्य समारोह आयोजना गरी भगवान् सङ्कर्षणकाे विग्रहकाे प्राण प्रतिष्ठा गरिने भएको छ ।
शेष महलमै आज एक पत्रकार सम्मेलन गर्दै आगामी माघ २१ गते सम्पन्नबाट सुरु हुने समारोहमा देशभरबाट ५ हजार बढीको ससहभागिता रहने जनाइएको छ ।
पत्रकार सम्मेलनमा सङ्कर्षण यज्ञ र श्रीमद्भागवत एकाह पारायण लगायतका धार्मिक अनुष्ठानहरू हुने कार्यक्रममा सहभागि हुन आउने भक्तजनको लागि बसोवासको समेत राम्रो प्रवन्ध मिलाइएको आयोजकले जनाएको छ ।
चारयुगका उपास्यदेवताहरूको परम्पराअनुसार सत्ययुगमा तपस्या, त्रेतायुगमा यज्ञ, द्वापरयुगमा पूजा, र कलियुगमा हरिनाम सङ्कीर्तनको माध्यमबाट उपासना गरिनुपर्ने धार्मिक मान्यता रहेको छ । यही अनुरूप भगवान् सङ्कर्षणको विग्रह प्राण प्रतिष्ठा गर्न लागिएको हरेराम संकीर्तन कुञ्जले जनाएको छ ।
समारोहमा जानकी जीवन कृञ्ज, काठमाडौंका श्रीअनन्तप्रसाद गौतम गुरु तथा श्रीअजितप्रसाद गौतम गुरुहरूको उपस्थितिसहित श्रीमद्भागवत पारायण हुने छ । अमर अखण्ड हरिनाम सङ्घर्तन मण्डल, काभ्रेका पण्डितहरूको समेत सहभागिता रहनेछ ।
जयपुर, भारतका कलाकारद्वारा सिंहमरमरमा कुँदिएको यो विग्रह विश्वमै पहिलो रहेको बताइएको छ। करिब १ करोड रुपैयाँको लागतमा निर्मित शेष महल ३५ फिट अग्लो छ, जसलाई तालध्वज रथको अवधारणामा १४ स्तम्भहरूको आधारमा निर्माण गरिएको छ।
शेष महलकाे निर्माण कार्यमा गुरु श्रीकविप्रसाद गौतमका भतिजा तथा गुरु श्री ज्योतिप्रसाद गौतममा छाेरा श्रीमुरारिप्रसाद गौतमको अग्रसरता रहनुका साथै श्रद्धालु भक्तजनहरूको समेत सहयोग रहेको हरेराम संकीर्तन कुञ्ज स्याङ्वाडाँडाले जनाएको छ ।
धार्मिक पर्यटन प्रवद्र्धन गर्ने उद्देश्यले दीर्घकालमा स्याङ्वाडाँडालाई शेषधामको रूपमा विकास गर्दै वृन्दावनधामसरह तीर्थस्थल बनाउने योजना रहेको आयोजकले जनाएको छ ।
