ईश्वरपुर,पुस -१५,पत्रकार राकेश गुप्ता ‘चमेली साकोस पत्रकारिता सम्मान २०८१’ बाट सम्मानित भएका छन् ।
चमेली बचत तथा ऋण सहकारी संस्था लि. ईश्वरपुर–६ ले हरेक वर्ष प्रदान गर्दै आएको सो सम्मानबाट निगरानी टुडे पत्रिका तथा रेडियो निगरानी १०७ मेगाहर्जका सञ्चालक गुप्ता सम्मानित भएका हुन् ।
राजधानी दैनिक र रेडियो नेपालको सर्लाही सम्वाददाता समेत रहेका पत्रकार गुप्तालाई सो सहकारी संस्थाको २४औं स्थापना दिवस तथा २१औं वार्षिक साधारण सभा २०८१ को अवसर पारेर सम्मान गरेको हो ।
उनलाई पत्रकारीताको माध्यमबाट जनचेतना फैलाई देश तथा मधेश प्रदेशमा सु–शासन कायम गर्न अनुकरणीय कार्य गरेको भन्दै चमेली साकोस पत्रकारीता सम्मान २०८१ बाट सम्मान गरिएको चमेली बचत तथा ऋण सहकारी संस्थाका प्रमुख कार्यकारी अधिकृत भरत साहले बताए ।
कार्यकारी अधिकृत साहका अनुसार संस्थाका अध्यक्ष रामप्रताम साहको अध्यक्षता तथा सर्लाही क्षेत्र नम्बर १ का संघीय सांसद रामप्रकाश चौधरीको प्रमुख आतिथ्यतामा भएको संस्थाको वार्षिक साधारण सभाको अवसर पारेर दोसल्लासहित सम्मान पत्रबाट पत्रकार गुप्तालाई सम्मान गरिएको हो ।
उनले सरकारी क्षेत्रसहित समग्र देश तथा मधेश प्रदेशमा सु–शासन कायम गर्न महत्वपूर्ण भूमिका खेल्ने पत्रकारहरुलाई संस्थाको वार्षिक साधारण सभाको अवसर पारेर सम्मान गर्ने गरिएको बताए । सो संस्थाले गत वर्ष पत्रकार डुकु प्रसाद कोइरालालाई यस सम्मानबाट सम्मान गरेको थियो ।
